НИТХ-ЫН ТЭРГҮҮЛЭГЧДИЙН 2014.12.15-НЫ ӨДРИЙН ХУРАЛДААНЫ МЭДЭЭ

Хэлэлцсэн нь:

2014 оны 12 дугаар сарын 15-ны өдөр 10 цагаас Нийслэлийн засаг захиргааны 1-р байрны А танхимд НИТХ-ын тэргүүлэгчдийн хуралдаан боллоо. Хуралдаанд тэргүүлэгч Д.Баттулга, Л.Шагдаррагчаа, Г.Ганбаяр, С.Очирбат, Ц.Одонтунгалаг, Т.Гантөмөр, А.Гантулга, Т.Бат-Эрдэнэ, Болдбаатар, Энх-Амгалан нар оролцов.

Хуралдаанаар дараах асуудлуудыг хэлэлцлээ. Үүнд:

1. 1-р сургуулийн өргөтгөлийн барилгыг нийслэлийн өмчид бүртгэн авах тухай
2. БЗД-ийн 14-р хороонд байрлах 475, СБД-ийн 11-р хороонд байрлах 552, СХД-ийн 5-р хороонд байрлах 233-р ус түгээх байруудыг бүртгэлээс хасах тухай
3. Хан-Уул дүүргийн 137-р цэцэрлэгийг татан буулгах тухай
4. Нийслэл, дүүргийн орон нутгийн төсвийн байгууллага, өмчит үйлдвэрийн газрын ажиллагсадад үр дүнгийн шагнал, урамшуулал олгох журам батлах тухай
5. Нийслэлийн сайн малчин шалгаруулах журам батлах тухай
6. Нийслэлийн тэргүүний фермер шалгаруулах журам батлах тухай
7. Нийслэлийн хот орчмын бэлчээрийн менежментийг сайжруулах, хөдөө аж ахуйн үйлдвэрлэлийг дэмжих журам батлах тухай
8. Улаанбаатар хотын үерийн хамгаалалтын барилга байгууламжийг 2020 он хүртэл хөгжүүлэх хөгжлийн хөтөлбөр батлах тухай
9. Нийтийн эзэмшлийн гудамж, зам талбай, орон сууц, гэр хорооллын гэрэлтүүлгийг сайжруулах хөтөлбөр батлах тухай
10. Улаанбаатар хотын замын хөдөлгөөнийг сайжруулах талаар авах зарим арга хэмжээний тухай
11. Тусгай зөвшөөрөл олголтын талаар авах зарим арга хэмжээний тухай
12. НИТХ-ын ээлжит 22-р хуралдааныг зарлах тухай
13. НИТХ-ын 2012 оны 5/39 дүгээр тогтоолыг хүчингүй болгох тухай асуудлуудыг хэлэлцэв.

Сонссон нь:

1. 1-р сургуулийн өргөтгөлийн барилгыг нийслэлийн өмчид бүртгэн авах тухай асуудлыг Нийслэлийн засаг даргын орлогч Н.Батаа танилцуулав.

Н.Батаа: Монгол улсын 2011 оны төсвийн тухай хуулийн Боловсрол, шинжлэх ухааны сайдын төсвийн жагсаалтад тусгагдсан Сүхбаатар дүүргийн 1-р сургуулийн өргөтгөлийн ажлыг нийт 1,8 тэрбум төгрөгөөр барихаар шийдвэрлэсэн. Уг барилгын ажлын гүйцэтгэлийг “Батс Өргөө” ХХК гүйцэтгэсэн. Уг өргөтгөлийн барилга нь 640 хүүхдийн суудалтай, 1137 м2 талбайтай, 11 анги, багш нарын өрөө, эмчийн өрөө, хүүхэд хөгжүүлэх өрөө, чийрэгжүүлэлтийн өрөө бүхий 4 давхар барилга юм. Хийцийн хувьд төмөр каркасан бүтэцтэй, хавтгай дээвэр, тоосгон ханатай, угсар бетон барилга юм. Гадна шугам сүлжээ нь төвийн шугамд холбогдсон. Цайны газрын өргөтгөл нь 138 м2 талбайтай, төмөр бетон каркасан бүтэцтэй, тоосгон хана хар цаасан дээвэртэй, 1-р давхарт цайны газар, 2-р давхарт түүхийн алдрын танхим байрлана. Цайны газрын өргөтгөлийн өртөг нь 145751532 төгрөг, хашаан доторх бетонон зам 50635163 төгрөг. Нийслэлийн мэргэжлийн хяналтын барилга байгууламжийн ашиглалтад оруулах улсын комиссын шийдвэрээр бүртгэгдсэн тул нийслэлийн өмчөөр бүртгэж авна уу.

Шийдвэрлэсэн нь:

Сүхбаатар дүүргийн 1-р сургуулийн 1 335 186 695 төгрөгийн өртөг бүхий барилга байгууламжийг нийслэлийн өмчөөр бүртгэн авах шийдвэрийг гаргалаа.

Сонссон нь:

2. БЗД-ийн 14-р хороонд байрлах 475, СБД-ийн 11-р хороонд байрлах 552, СХД-ийн 5-р хороонд байрлах 233-р ус түгээх байруудыг бүртгэлээс хасах тухай асуудлыг Нийслэлийн Засаг даргын орлогч Н.Батаа танилцуулав.

Н.Батаа: НИТХ-ын 2013 оны 2 дугаар сарын 3/31 дүгээр тогтоолоор батлагдсан “Гэр хорооллын дахин төлөвлөлтийн үйл ажиллагааны журам”-ын дагуу БЗД-ийн 13, 14-р хорооны нутаг дэвсгэрийн А, Г, Д, Ё блок дээр нийт 53,1 га газарт төсөл хэрэгжүүлэх ажил үе шаттайгаар хэрэгжиж байна. Төсөл хэрэгжиж буй газруудад дулааны шугам сүлжээ татах ажлыг эхлүүлэх гэхэд ус түгээх худгууд байгаа тул худгуудыг бүртгэлээс хасах шийдвэрийг гаргаж өгнө үү.

Шийдвэрлэсэн нь:

Тэргүүлэгчид худгуудыг нийслэлийн өмчөөс хасах шийдвэрийг гаргалаа. Хэдийгээр хөрөнгөөс хассан ч гэлээ дээрх худгууд нь ямар нэгэн эвдрэл гэмтэлгүйгээр ажиллаж байсан учраас өөр газар шилжүүлж, хэвийн ажиллагааг үргэлжлүүлж байгааг эргэн мэдэгдэхийг үүрэг Засаг даргад болголоо.

Сонссон нь:

3. Хан-Уул дүүргийн 137-р цэцэрлэгийг татан буулгах тухай асуудлыг нийслэлийн өмчийн харилцааны газрын хэлтсийн дарга Буянжаргал танилцууллаа.

Буянжаргал: Төрийн өмчийн хорооны 2014 7 дугаар сарын 03-ны өдрийн тогтоолоор Дулааны 3-р цахилгаан станц төрийн өмчийн хувьцаат компаний хуучин барилга актлагдаж, буулгах болсон тул тус барилгад байрлаж байсан Хан-Уул дүүргийн 137 дугаар цэцэрлэгийг татан буулга гэсэн шаардлагыг удаа дараа ирүүлсэн. Иймд Нийслэлийн боловсролын газраас уг цэцэрлэгт ажиллаж байсан 21 ажилтаныг бусад цэцэрлэгт шингээж, 75 хүүхдүүдийг тараан байрлуулсан. Сургуулийн өмчийн хөрөнгийг мөн бусад цэцэрлэгүүдэд тараасан байгаа. Иймд татан буулгаж өгнө үү.

Тэргүүлэгч Энх-Амгалан: Татан буулгах эс буулгах асуудлыг тэргүүлэгчид эхлээд гаргадаг. Гэтэл та нар татан буулгах шийдвэр гаргаагүй байхад цэцэрлэгийг тараасан байгаа чинь ямар учиртай юм. Тэргүүлэгчдээр шийдвэрлүүлээгүй байж яагаад цэцэрлэгийг өмч хөрөнгийг үгүй хийж үрэн таран болгосон юм.

Буянжаргал: Өнгөрсөн 7-р сард төрийн өмчийн хорооноос хэрвээ цэцэрлэгийнхээ өмч хөрөнгийг яаралтай ирж авахгүй бол гаргаж хаяна гэсэн мэдэгдэл ирүүлсэн тиймээс яаралтай арга хэмжээ авч бусад цэцэрлэгүүдэд шилжүүлсэн байгаа.

Д.Баттулга: Одоо та нар тэргүүлэгчид ажил хийгээгүй гэж ярих нь уу. Тэргүүлэгчид 6, 7, 8-р сарууд бүгдэд нь хуралдсан. Тэр үед яаралтай гээд оруулаад ирсэн бол хэлэлцээд шийдвэрлэх л байсан. Тэр үед шийдээгүй байж одоо биднийг буруутгах нь. Ер нь цаашид тэргүүлэгчдээр шийдвэрлэгдсэн асуудлыг албажуулах зүйл оруулж ирдгийг болиорой. Хурлын ажлын албаныхан ч гэсэн тийм материалыг битгий хүлээж аваарай.

Шийдвэрлэсэн нь:

Тэргүүлэгчид 137-р цэцэрлэгийг татан буулгах асуудлыг буцаах шийдвэрийг гаргалаа.

Сонссон нь:

4. Нийслэл, дүүргийн орон нутгийн төсвийн байгууллага, өмчит үйлдвэрийн газрын ажиллагсадад үр дүнгийн шагнал, урамшуулал олгох журам батлах тухай асуудлыг Н.Батаа танилцуулав.

Н.Батаа: Монгол улсын төсвийн тухай хуулийн 46 дугаар зүйлийн 46.1-т төсвийн захирагчид туслах үйл ажиллагааны ашиг, төсвийн зарлагын хэмнэлт болон төсвийн захирагчийн үр дүнгийн гэрээний урамшууллыг төсвийн урамшуулал болгон тус тус олгож болно, төсвийн урамшууллыг энэ хуулийн 445-д заасан арга хэмжээ болон байгууллагын хамт олныг ажлын үр дүнг харгалзан урамшуулах, нийт ажилтны нийгмийн асуудлыг шйидвэрлэх зэрэг нийтлэг арга хэмжээнд зарцуулна гэж тус тус заасан байдаг. Нийслэл дүүргийн орон нутгийн төсвийн байгууллага өмчит үйлдвэрийн газрын ажилтнуудын ажиллах идэвх санаачлагыг дэмжих, шагнаж урамшуулах, төсвийн орлогын эх үүсвэрийг нэмэгдүүлэх, зардлыг бууруулах, шинэ санал санаачлыг гаргаж бодитой хувь нэмэр оруулсан ажилтан албан хаагчдыг урамшуулдаг тогтолцоо нэвтрүүлэхэд энэхүү журмын гол зорилго оршиж байгаа. Хэлэлцэн дэмжиж өгнө үү.

Ц.Одонтунгалаг: Энэ журам төсвийн бүх байгууллагын үйл ажиллагааны онцлогт нийцэхгүй байна. Тухайлбал манай автобус нэгтгэл үр ашигтай ажилласан мөртлөө зардал нь орлогоосоо даваад байдаг. Тэгэхээр юугаараа ажилчдаа урамшуулах юм.

Л.Шагдаррагчаа: Журмын үр дүнг тооцохдоо гагцхүү эдийн засгийн хэмнэлтэд тулгуурлана гэсэн нь учир дутагдалтай байна. Эдийн засгийн хэмнэлт гаргаж байна гээд ажлаа цалгардуулах нөхцөл үүсэхийг үгүйсгэх аргагүй. Иймд эдийн засгийн хэмнэлт болон үр дүнгийн биелэлтийг хамтад нь авч үзэн оруулах шаардлагатай шүү.

Шийдвэрлэсэн нь: Төлөөлөгчдөөс гарсан саналуудыг тусган төсвийн байгууллагын ажилтан ажиллагсдыг шагнаж, урамшуулах журмыг баталлаа.

Сонссон нь:

5. Нийслэлийн сайн малчин шалгаруулах журам батлах тухай,  Нийслэлийн тэргүүний фермер шалгаруулах журам батлах тухай асуудлыг Нийслэлийн Засаг даргын орлогч Т.Бат-Эрдэнэ танилцуулав.

Т.Бат-Эрдэнэ: Өнөөдрийн байдлаар Нийслэлийн хэмжээнд 5000 өрхийн 350000 мянган мал бэлчээрлэж байна. Нийслэлийн нутаг дэвсгэрт байгаа тэдгээр мал бүхий иргэд өөрсдийн ажил хөдөлмөрөө үнэлүүлж, улсын сайн малчин цол хүртэхийн тулд заавал нийслэлийн сайн малчин гэсэн шагналыг авсан байх учиртай аж. Харамсалтай нь 2010 оноос хойш нийслэлийн сайн малчинг шалгаруулаагүй нь нийслэлд амьдарч буй малчин иргэдийн эрхийг зөрчсөн үйлдэл болоод байна. Иймд нийслэлийн сайн малчин шалгаруулах журмыг баталж өгнө үү. Мөн нийслэлийн нутаг дэвсгэрт эрчимжсэн мал аж ахуй эрхэлдэг айл өрхүүд асар их байгаа. Тэдгээрийг стандартын шаардлага хангуулж, үйл ажиллагаагаа сайжруулах ажлыг дэмжин урамшуулах зорилгоор тэргүүний фермер шалгаруулах журмыг өргөн барьж байна баталж өгнө үү.

Энх-Амгалан: Улаанбаатарын нутаг дэвсгэрт мал аж ахуй эрхлэхийг хориглосон зүйл байдаг. Нийслэлийн сайн малчин гэсэн журмыг баталчихаар сайн малчин авах гэсэн хүмүүс малаа олноор нь өсгөөд шахаад эхлэх юм биш биз. Гэнэтхэн мал амьтны гоц халдварт өвчин гарах зэрэг хүндрэл эрсдэл олон байдаг энэ бүхнийг бодолцож үзээрэй. Ер нь нийслэлийн сайн малчин гэдэг журмыг батлах шаардлага байгаа юм уу. Улсын сайн малчинд горилж байгаа хүмүүс цаашаа хэнтий,  төв аймагт гарч амьдарч болдоггүй юм уу.

Т.Бат-Эрдэнэ: Хотын зургаан дүүргээс гадна алслагдсан 3 дүүрэг манай нийслэлд бий. Тэнд амьдарч байгаа хүмүүс малаараа шахаад ороод ирнэ гэсэн зйүл лав байхгүй. 130 кмын цаана байгаа малчин хүнийг нийслэлээс гар цаашаа яв гэж хэлэх нь хүний эрхэд халдсан, хүний ажил үйлсээ үнэлүүлэх боломжийг хязгаарласан ажил болно шүү. Тиймээс энэ журмыг баталж өгнө үү.

Л.Шагдаррагчаа: Нийслэлийн сайн малчин шалгаруулах үндэслэлийг харахад өмнөх оныхоос мал нь буураагүй байна гэх мэт тоон үзүүлэлтийг олноор нь тавьжээ. Энэ буруу юм. Үүний үр дүнд хүмүүс тооны араас хэтэрхий хөөцөлдөөд малын чанар, үр шимийг сайжруулах ажил нь хойш тавигдаж байна. Иймд тоон үзүүлэлтийг авч хаяад чанарын үзүүлэлт тухайлбал, мах сүүний ямар үүлдэрийг оруулж ирсэн, үүний үр дүнд нэг малаас гарах үр шим хэрхэн нэмэгдсэнийг нь гол үзүүлэлт болгон шагнадаг болгомоор байна.

Шийдвэрлэсэн нь:

Тэргүүлэгчид нийслэлийн сайн малчин шалгаруулах журмыг тоон үзүүлэлт бус чанарын үзүүлэлтийг харгалзан олгодог болохоор өөрчлөн баталлаа. Шилдэг фермер шалгаруулах журмыг ч мөн баталсан болно.

Сонссон нь:

6. Нийслэлийн хот орчмын бэлчээрийн менежментийг сайжруулах, хөдөө аж ахуйн үйлдвэрлэлийг дэмжих журам батлах тухай тогтоолын төслийг Т.Бат-Эрдэнэ танилцуулав.

Шийдвэрлэсэн нь:

Тэргүүлэгчид уг тогтоолын төслийг буцаах шийдвэрийг гаргалаа.

Сонссон нь:

7. Улаанбаатар хотын үерийн хамгаалалтын барилга байгууламжийг 2020 он хүртэл хөгжүүлэх хөгжлийн хөтөлбөр батлах тухай тогтоолын төслийг Нийслэлийн захирагчийн ажлын албаны дарга Б.Бадрал танилцууллаа.

Б.Бадрал: Улаанбаатар хотод шууд үерийн эрсдэлтэй бүсэд 3000 орчим айл өрх амьдарч байна. Үерийн хамгаалалтын барилга байгууламжтай бүсийн 130 км далан сувгийн насжилт 78,3 хувь хүрч, 85 км шугам сүлжээний 50-аас илүү хувь нь ашиглагдах хугацаа дуусчээ. Үерийн эрсдлийг бууруулах, хотын тогвортой хөгжлийг хангах үүднээс 2020 он гэхэд 12 байршилд 141 тэрбумын хөрөнгө оруулалтаар суваг шуудуу барих шаардлагатай байна. Иргэдийн эрүүл аюулгүй байдлыг хангах үүднээс энэ ажил хийгдэх шаардлагатай учраас энэ ажлыг дэд бүтцийн төлөвлөтөд хамруулаад төсөвтөө суулган шийдвэрлэхээс өөр гарц алга байна. Та бүхэн хэлэлцэн баталж өгнө үү.

Л.Шагдаррагчаа: 2015 оны төсөвт энэ ажил тусгагдаж суусан уу.

Б.Бадрал: 2015 оны төсөвт 3 байршилд суваг шуудуу татахаар 8,8 тэрбум төгрөг суусан байгаа.

Д.Баттулга: 3000 өрх эрсдэл бүхий бүсд байна гэсэн байна. Энэ айлууд газраа өмчилж байгаа юу? Эзэмшиж байгаа юу? Бид нар хөтөлбөр батлаад өгч болно харин хэрэгжүүлэх чадал байгаа юу?

Б.Бадрал: Дийлэнх өрхүүд нь газраа өмчилсөн байгаа. Мэдээж хууль бусаар зөвшөөрөлгүй буусан, олон жил суурьшиж байгаа мөртлөө газраа өмчилж чадаагүй хүмүүс ч бас байгаа. Жил жилийн төсөвт суулгаад тодорхой зардлаа суулгаад явбал энэ ажил явна.

Шийдвэрлэсэн нь: Тэргүүлэгчид үерийн байгууламжийг хөгжүүлэх хөтөлбөрийг баталлаа.

Сонссон нь:

8. Нийтийн эзэмшлийн гудамж, зам талбай, орон сууц, гэр хорооллын гэрэлтүүлгийг сайжруулах хөтөлбөр батлах тухай хөтөлбөрийг Нийслэлийн захирагчийн ажлын албаны дарга бөгөөд Улаанбаатар хотын ерөнхий менежер Б.Бадрал танилцуулав.

Б.Бадрал: Улаанбаатар хотын хэмжээнд нийтийн эзэмшлийн гудамж зам талбай, орон сууц, гэр хорооллын гэрэлтүүлгийн 24492 шон, 35372 гэрэлтүүлэгч, 722 ширхэг удирдлагын самбар, 803913 м СИП кабель, 294588 м АВВБ маркын кабелийн засвар үйлчилгээг хариуцан нийтийн үйлчилгээний Улаанбаатар нэгтгэл, Нийслэлийн ЗДТГ-тай 13 аж ахуй нэгж хамтран ажиллах гэрээ байгуулан ажиллаж байна.

Нийтийн эзэмшлийн гудамж талбайн 80 хувь, орон сууцны хорооллын 90 хувь, гэр хорооллын 60 нь гэрэлтүүлэгтэй байгаа. Тэдгээрийн цахилгаан эрчим хүчний төлбөрт 1,2 тэрбум, засвар үйлчилгээнд 3,7 тэрбум төгрөгийг жил бүр зарцуулж байна.

Хотын гэрэлтүүлгийг сайжруулах нэмэгдүүлэх чиглэлээр сүүлийн 3 жилд 7,5-аас 10,4 тэрбум төгрөгний хөрөнгө оруулалт хийгдсэн. Цаашид гэрэлтүүлгийн ашиглалтын түвшинг сайжруулах, дэвшилтэт технологи нэвтрүүлэх, гэрэлтүүлгийн сүлжээг шинээр бий болгох замаар эрүүл аюулгүй амьдрах орчныг бүрдүүлэх зайлшгүй шаардлагатай байгаа тул дараах хөтөлбөрийг баталлаа хэлэлцэн дэмжиж өгнө үү.

Шийдвэрлэсэн нь:

Тэргүүлэгчид шинээр баригдаж буй орон сууцны гэрэлтүүлэг ашиглалтад орохгүй байгаа. Цаашид гадаах гэрэлтүүлгийн асуудлаа шийдвэрлээгүй шинэ орон сууцыг ашиглалтад авахгүй байх ажлыг хийхийг үүрэг болгосны үндсэн дээр гэрэлтүүлгийг сайжруулах хөтөлбөрийг баталлаа.

Сонссон нь:

9. Улаанбаатар хотын замын хөдөлгөөнийг сайжруулах талаар авах зарим арга хэмжээний тухай асуудлыг Захирагчийн ажлын албаны дарга Б.Бадрал танилцуулав.

Б.Бадрал:

Нийслэл хотод бүтээн байгуулалтын ажил өрнөж, авто зам брих, өргөтгөн шиинэчлэх, замын хөдөлгөөн хянах, зохицуулах ажил ихээхэн хурдацтай, амжилттай хэрэгжиж байна.

2012-2014 онд нийслэлд 87.1 км авто зам барьж, 144,7 км авто замыг өргөтгөж, 30 уулзварыг өргөтгөн шинэчилж нэвтрүүлэх чадварыг сайжруулан 44 хөдөлгөөн зохицуулагч гэрэл дохиог шинээр суурилуулж ашиглаж байна.

Ийм бүтээн байгуулалт хийгдсэнтэй холбоотойгоор зам уулзваруудын нэвтрүүлэх чадвар сайжирж, иргэдээс дугаарын хязгаарлалтыг өөрчлүүлэх хүсэлт ихээр ирэх болсон. Нийслэлийн Засаг даргын орлогч Н.Гантөмөрөөр ахлуулсан ажлын хэсэг авто замын ачааллыг зохицуулах арга хэмжээг зохион байгуулах, нэгдсэн удирлагаар хангах ажлын хэсэг уг ажлыг дэмжсэн учраас тэргүүлэгчдийн хуралдаанд оруулж байна. Шинэ зохицуулалтаар тээврийн хэрэгслийн улсын дугаарын бүсчлэл, цагийн хувиарыг өвөл зуны хувиарт шилжүүлж байгаа бөгөөд 4-р сарын 15-аас 10 дугаар сарын 15-ны хооронд томсгосон бүсчлэлд 7-21 цагийн хооронд, 10-р сарын 16-аас 4-р сарын 14-ны хооронд багасгасан бүсчлэлд 8-20 цагийн хооронд хязгаарлалт хийх саналыг оруулж байна. Хэлэлцэн баталж өгнө үү.

Шийдвэрлэсэн нь:

Тэргүүлэгчид улсын дугаараар хөдөлгөөнд хязгаарлагдаж байгаа цагийг өвөл, зуныг үл харгалзан 08 цагаас 20 цаг болгон өөрчилсний зэрэгцээ хумигдсан бүсчлэлийг зөвхөн өвлийн улиралд хэрэгжүүлэх шийдвэрийг гаргалаа. Ингэснээр авто тээврийн хөдөлгөөнд оролцогч иргэд дугаарын хязгаарлалттай өдрөө 8-20 цагийн хооронд л хөдөлгөөнд оролцохгүй болохоор боллоо.

НИТХ ДАХЬ МАХН-МҮАН-ЫН “ШУДАРГА ЁС” ЭВСЛИЙН БҮЛГИЙН АЖЛЫН АЛБА

НИТХ-ын тэргүүлэгч Л.Шагдаррагчаагийн 4-р улирлын тайлан

Нийслэлийн эдийн засаг, нийгмийн 2015 оны зорилт

Нийслэлийн 2015 оны төсөв

Нийслэлийн өмчийн концессын зүйлийн жагсаалт /шинэчлэн баталсан/

2015 онд Нийслэлийн өмчөөс хувьчлагдах хуулийн этгээд, эд хөрөнгийн жагсаалт

Нийслэлийн 2015 оны газар зохион байгуулалтын төлөвлөгөө

НИТХ-ын тэргүүлэгчдийн 2014.12.15-ны өдрийн хуралдаанаар хэлэлцэх асуудлын төлөвлөгөө

НИТХ-ын ээлжит 21-р хуралдаанд хүргүүлсэн бүлгийн санал, дүгнэлт

Ажлын хэсэгт Д.Батбаярыг оруулахаар шийдвэрлэлээ

        

    НИТХ дахь МАХН-МҮАН-ын “Шударга ёс” эвслийн бүлэг 2014 оны 12 дугаар сарын 02-ны хуралдаанаар “Гэр хорооллын дахин төлөвлөлтийн ажлын явцтай танилцах  ажлын хэсэг”-т төлөөлөгч Д.Батбаярыг оруулах шийдвэрийг гаргалаа.

НИТХ-ын Хот байгуулалт, дэд бүтцийн хорооны санал, дүгнэлт

Хүүхдийн эмнэлэгт барих ажил 100 хувийн биелэлттэй

Нийслэлийн 2014 оны төсвийг батлах хуралдаан дээр НИТХ-ын Шударга ёс эвслийн бүлгийн төлөөлөгч С.Ононбаяр хүүхдийн эмнэлэг хүрэлцээгүй байна. Нийслэлийн 9 дүүрэгт 9 эмнэлэг бариулъя гэдэг саналыг өргөн барьж байв. Уг асуудал хэдийгээр зураг төсөвгүй байсан ч гэлээ нийт төлөөлөгчдийн дэмжлэгийг авч нийслэлийн төсөвт шаардлагатай хөрөнгийг суулгаж байв.

Харин 2014 оны нийслэлийн эдийн засаг, нийгмийн зорилтын биелэлтийн асуудлыг хэлэлцэж байх үед хүүхдийн эмнэлэгийн асуудлын биелэлт 100 хувь гэж гарсан байсан нь асуудлыг өргөн барьсан С.Ононбаяр төлөөлөгчийн эгдүүг хүргэсэн юм.

С.Ононбаяр: Би 2014 оны төсөвт хүүхдийн эмнэлэг барих асуудлыг өргөн барьж шаардлагатай хөрөнгийг төсөвт суулгуулж байсан. Ямарч эмнэлэг шинээр ашиглалтад ороогүй байхад яахаараа биелэлт нь 100 хувь гээд ороод ирж байгаа юм бэ? Хэмээн тодруулахад

НЗДТГ-ын хяналт шинжилгээ, үнэлгээний хэлтсийн дарга гэгч босч ирээд 2014 оны зорилтот эмнэлэг барих биш харин эмнэлэг барихад шаардлагатай судалгаа хийх санал л орсон тэгээд энэ жилийн хугацаанд судалсан гэдэг тэнэгдүү хариултыг өгч байв.

НИТХ-ын төлөөлөгчдөөс гаргасан санал, баталсан төсөв нь амьдрал дээр хэрэгжээгүйгээс үүдэн ямар үр дагавар гарч байгааг та бид бэлхнээ харж байна.

хүүхдийн эмнэлэгүүдийн өнөөгийн байдал.

Бүлгийн хуралдаанаар хэлэлцэх асуудлын төлөвлөгөө

НИТХ-ын тэргүүлэгчдийн 2014.11.25-ны өдрийн хуралдаанаар баталсан тогтоолууд

Нийслэлийн аудитын газраас 2015 төсөвт өгсөн саналууд

НИЙСЛЭЛИЙН ИРГЭДИЙН ТӨЛӨӨЛӨГЧДИЙН ХУРАЛ ДАХЬ МАХН-МҮАН-ЫН “ШУДАРГА ЁС” ЭВСЛИЙН БҮЛГИЙН ТӨЛӨӨЛӨГЧДИЙН 2015 ОНЫ ТӨСӨВТ ӨГСӨН САНАЛУУД

Төлөөлөгч С.Ононбаяр:

1. Түрүүн Г.Ганбаяр төлөөлөгч хүүхдийн эмнэлэг барих саналыг НИТХ-д оруулсан гэж ярилаа. Яг үнэндээ 2014 оны төсвийг хэлэлцэж байх үед хүүхдийн эмнэлгийн асуудлыг би оруулсан юм шүү. Намайг оруулсныг Д.Баттулга дарга өөрөө ч санаж байгаа. Би ганц эмнэлэг ч биш бүр 9 дүүрэг бүрт нэг нэг хүүхдийн эмнэлэг барих саналыг оруулж нийт төлөөлөгчдөөр дэмжүүлсэн юм шүү. Ер нь төсөвт суулгаж баталсан ажлын хэрэгжилт их удаан байгаа шүү.
2. Би тойрогтоо тэд эдийг суулгана гэж ярихгүй. Нийслэлийн 1,3 сая иргэдээс сонгогдсоны хувьд нийт иргэдийгээ төлөөлж саналаа өгнө. Миний эхнээс нь хөөцөлдөж байсан ажил бол шүд, эрүү нүүрний эмгэг судлалын эмнэлэгийн ажил байгаа. Манай нийслэлд шүдээр өвдөж байгаа хүүхэд хэд байгаа билээ. Цор ганц дагнасан эмнэлэгээ бариулчих юмсан гэж тэргүүлэгч байхаасаа ажиллаад дийлсэнгүй. Энэ одоо ямар учиртай юм бэ. Цаана нь эдийн засгийн ямар нэгэн сонирхол байгаа юм болов уу гэж сүүлдээ бодоход хүрч байна. Тэргүүлэгч байхдаа концессоор 12 давхар байшин байриулаад тэрний 4 давхарт нь шүд, эрүү нүүрний эмнэлэг бариулах тогтоолыг баталж байсан юм. Гэтэл тэр концессыг хүчингүй болгочихсон гэх юм. Барилга нь актлагдсан шүд, эрүү нүүрний эмгэг судлалын эмнэлэг миний сонссоноор 2-3 газар түрээслээд сүүлдээ иргэд тэр эмнэлэгээ олхоо байсан гэж дуулдах болсон. Энэ асуудлыг дэмжээд тэр эмнэлэгийн асуудлыг нэг тийш болгооч гэж хүсч байна.
3. Ухаалаг Улаанбаатар төсөл гэж нэг ажил байна. Өнгөрсөн жил энэ төсөлд зарцуулах 5 тэрбумыг төсөв суулгасан. Тэгээд хийсэн ажлаа сая тайлагна гэхэд утгагүй юм ярьж байнаа. Ийм зүйлд дахин мөнгө суулгамааргүй байна. Арай бодитой зүйлд хөрөнгө оруулъя. Ирэх жил зарцуулахаар суулгасан 2 тэрбумыг хасах саналтай байна.
4. Би нийтийн тээврийн анхан шатны байгууллагад ажилладаг хүний хувьд саналаа хэлье. Нийтийн тээврийг шинэчлэх цаг болсон. 2013 оны НИТХ-ын 81-р тогтоолоор нийслэлийн нийтийн тээвэрт ноу хау буюу шинэ технологи нэвтрүүлэх хөтөлбөрийг баталсан. Манай иргэд нийтийн тээвэр маань одоо л нэг гайгүй болох нь уу гээд хүлээгээд байдаг гэтэл тэр ажил явахгүй байна. Нийтийн тээвэрт хийх ажлууд өмнө нь ямарч тооцоо судалгаагүй хийгддэг байсан. Сүүлийн жишээг хэлэхэд л 1 билетээр өдөржин зорчих ажлыг туршсаны дүнд нийслэлийн засаг даргын нөөц хөрөнгөнөөс 1.7 тэрбум төгрөгийг дэмий урсгасан. Нийтийн тээврийг хөгжүүлэхийн тулд бид бүхэн тооцоо судалгаатай ажилд л хөрөнгө оруулалт хийх хэрэгтэй. Олон улсад мөрдөгдөж буй нийтийн тээврийн жишгийг нэвтрүүлэхийн тулд тооцоо судалгаатай олон улсын практик туршлагат тулгуурлсан ажлыг Ц.Баатархүү дарга, нийтийн тээврийн Улаанбаатар нэгтгэлийн дарга Ц.Одонтунгалаг, ухаалаг улаанбаатар хөгжлийн хорооны төлөөлөгчид бусад хүмүүсийг оролцуулсан томоохон төсөл хөтөлбөрийг боловсруулсан. Энэхүү төслөө хурлын дарга, Засаг дарга Э.Бат-Үүл, засаг даргын орлогч Н.Батаа нарт хүргүүлсэн байгаа. Энэ төсөл хөтөлбөрийг маань та бүхэн дэмжиж өгөөрэй. Нийтийн тээврийн маршрутын судалгаа, зорчигчдын судалгаа, метроны хэрэгцээ шаардлага зэрэг бүх материалуудыг тооцсон төслийг өргөн барьсан.
5. Автобусны нөхөн олговрыг ярих шаардлага байгаа. Автобусны нөхөн олговрыг засгийн газар 400 төгрөгөөр тооцож төсөвт суулгасан байна лээ. Гэтэл яг үнэндээ автобусны үнэ 500 төгрөг байгаа. Бас нөхөн олговрыг санхүүжилтыг нийслэлд үрүүлсэн зэрэг асуудал байгаа. Энэ асуудлаа зөв гаргалгаагаар яаралтай нэг мөр болгох хэрэгтэй гэж хүсч байна.
6. НИТХ нийтийн тээвэрт анхаарч ажиллаж байгаа. Гэхдээ тээврийн салбарын эрэлт хэрэгцээ, ачаалал, зорчигчийн урсгалын талаарх нарийвчилсан судалгааг хийх хэрэгтэй. Дэлхийн томоохон хот жил тутам 2 судалгаа хийдэг бид 24 жил судалгаа хийсэнгүй. Судалгаатай шийдвэрээс зөв төлөвлөлт гарна.
7. Тээврийн салбарын бодлого төлөвлөлтийг дахин хийх хэрэгтэй. Ямар тээврийн төрөл нэвтрүүлэх вэ? Метро яг хэрэгтэй юу? Метро барих төсвөөрөө Би Ар Ти барих уу? Дугаарын хязгаарлалтаа цаашид яах вэ? Тээврийн татварын бодлого гээд олон асуудал байна. Урт хугацааны төлөвлөлт хийж байж шийдвэрээ уялдуулан гаргая.
8. Орчин үеийн технологийг ашиглая. Бэлэн программуудыг худалдан авья. Яг энд хороолол баривал замын түгжрэл хэдэн хувь багасна эсвэл түгжрэх нь тэдэн хувь нэмэгдэнэ гэдгийг нэг товч дараад л тодорхой хардаг тийм программыг нэвтрүүлэх шаардлагатай байна. 

Төлөөлөгч Л.Шагдаррагчаа: 

Манай төлөөлөгчид хэлэлцэж байгаа сэдвээ ойлгохгүй ярьсаар байгаад өдрийг барчихлаа. Уул нь гол зарчмын асуудлаа ярих ёстой байсан. Бид бүлгээр яриад хэлэлцэж оруулах сургууль, цэцэрлэгийн асуудлыг өдөржин ярилаа.

НИТХ-д өргөн барьсан төсвийн төслийн боловсруулалт муу болсон байна гэж олон төлөөлөгч шүүмжилж байна шүү Н.Батаа даргаа. Бланслаагүй байна, зорилтоо хэрэгжүүлэх санхүүгийн программ болж чадаагүй байна, зардлын төрөл, төслийн стадионуудыг хооронд нь хольсон, зарим ажил арга хэмжээнүүдийг давхар төлөвлөсөн, төсвийн үндсэн харилцаа бланс алдагдсан, яамдын хийх ажлыг хотын төсөвт оруулсан зэрэг олон алдаа завхрал байна. Ийм байдлаар боловсруулсан төсвийг сайн гэж үзэх арга алга. Цаг хугацаа бага байгаа учраас энэ задгай ажлыг хороодоороо хэлэлцээд батлахаас биш. Та бүхэн сайн хамтарч ажиллаарай. Төсөв мөнгөний бололцоог харахад их хэцүү байна. Төлөвлөсөн ажлынхаа 60 орчим хувийг хийж чадах уу үгүй юу л гэдэг байна ш дээ. Орлогыг нэмэгдүүлэх, зарлагын хэмнэх чиглэлд боломжийг бүрэн дайчлаагүй гэж үзлээ. Тооцоод үзэхэд орлогыг 37 тэрбумаар нэмэгдүүлэх, зардлыг 28 тэрбумаар бууруулах шаардлагатай байна гэсэн бүдүүвч тооцоо байна. Сая төлөөлөгчдийн хэлсэн саналыг нэмэх юм бол орлогоо 60 тэрбумаар зардлаа 30 тэрбумаар бууруулах шаардлагатай гэсэн тооцоо гарч байна. 2014 оны зорилтыг шал худлаа дүгнэсэн байна лээ шүү. Ямар тооцоогоор гаргахаараа 89 хувьтай гаргасныг бүү мэд. Нүдэн багцаагаар агуулгаар нь шүүгээд үзэхэд л 20 хувь хүрэхгүй байна шүү. Мониторынгийн алба хэлтэс гэж хэрвээ байдаг биелэлтийг дахин үнэлж хороодын хуралдаанд танилцуулах хэрэгтэй шүү. Аудитаар үнэлүүлэх хэрэгтэй. Бид үнэлэлт дүгнэлт өгсөн тогтоол гаргана. Өргөн барьсан төслөөр төсвийн төслийн орлогын дүн ХБГ-ээс 2.4 хувиар буюу 56.1 тэрбум төгрөгөөр өсч өсөлтийн 85.4 %-ийг нийслэлийн татварын ,8.3%-ийг өмчийн болон газрын орлогоос бүрдүүлэхээр төлөвлөжээ.

Орон нутгийн төсвийн орлого 2014 оноос 2.8% өсч, зарлага нь 9.87% буурна гэсэн боловч урсгал зардлын хэмжээг 2.88% өсгөхөөр төлөвлөсөн байна. Орон нутгаас хийх хөрөнгө оруулалт 26.5 %, шуудын хөрөнгө оруулалт нь 14.4% , ОНХСанд хуваарилах хөрөнгө 20,9 % буурахаар, харин нийгмийн салбаруудын зардал 9.9 % өсөхөөр,түүнчлэн орлогын давалт төсвийн хэмнэлт гарахааргүй тооцжээ. Эндээс харахад зарлагын өсөлтийн хэмжээ нь орлогын өсөлтөө нөхөхгүй тэвчиж болохуйц урсгал зардлыг өсгөсөн төлөвлөлтийн харьцааг алдагдуулсан гэж үзэхээр байна.

Төлөвлөлтийн энэ хандлага нь Нийслэлд хийгдэх хөрөнгө оруулалт 64.4 тэрбумаар буурч 2013-2016 онд хийгдэхээр төлөвлөгдсөн нийгмийн болон инженерийн дэд бүтэцийн барилга байгууламжууд саатаж, гэр хороололд хийгдэж байгаа дахин төлөвлөлтийн 3 талт гэрээгээр Нийслэлийн хүлээсэн үүрэг тасалдаж, 2015 оноос ашиглалтанд орохоор төлөвлөгдсөн дахин төлөвлөлтийн барилга байгууламжууд ашиглалтанд орох боломжгүй болохоор байна.

Энэ байдлыг үнэлж үзээд Гэр хорооллын инженерийн шугам сүлжээний хөрөнгө оруулалтын талаар Нийслэлийн хүлээсэн үүргийг хангахад эхний ээлжинд шаардагдах 60 гаруй тэрбум төгрөгөөс ядаж 35 тэрбум төгрөгийг 2015 оны хөрөнгө оруулалтын төлөвлөгөөнд зайлшгүй тусгах шаардлагатай байна. Энэ зорилгоор Төсвийн төсөлд нэмэлт санхуугийн эх уусвэр гаргаж төсвийн зохицуулалт хийхийн тулд Нийслэлийн өмчийн зарим байгууллагуудыг өөрчлөн зохион байгуулах, оролцооны тодорхой хэсгийг хувьцаалан худалдах, газар эзэмших болзолт дуудлага худалдаа зохион байгуулах замаар 15 тэрбумаас доошгүй газрын төлбөрийг дайчлан нэмэгдүүлэхээр 3.0 тэрбумын орлого нэмэгдүүлэхийн зэрэгцээ, Найрсаг Улаанбаатар хөтөлбөрөөс 2.0 тэрбум, зээлийн батлан даалтын сангаас 2,0 тэрбум, цацрагийн аюулгүй байдлыг хангах хөтөлбөрөөс 16.5 сая, хот орчмын бэлчээрийн менежментээс 97.0 сая төгрөг, Цэцэрлэгжүүлэлтээс 2.0 тэрбум, хогны уутны 500 сая төгрөг, хот тохижилтын нэгдсэн арга хэмжээний зардлаас 451.0 сая төгрөг Нийслэл, дүүргийн төсвийн байгууллагын үйл ажиллагааны зардлаас 5.7 тэрбум, эрүүл аюулгүйн стандарт хэвшүүлэх үйл ажиллагааны зардлаас 500 сая, нарийн мэргэжлээр гадаад оронд мэргэжилтэн бэлтгэх зардлаас 200 сая, бүгд 28.464 тэрбум төгрөгийг хасаж, 2016 онд шилжүүлэх боломжтой гэж үзэж байна. Түүнчлэн Үндэсний цэцэрлэгт хүрээлэн, Гэрлэх ёслолын ордон, Зураг төслийн хүрээлэн, Нийтийн үйлчилгээний Улаанбаатар нэгтгэл, ОСНААУГ, УСУГ, Нийтийн тээврийн нэгтгэл, Улаанбаатар чуулга, Усан спорт сургалтын төв зэрэг байгууллагуудыг өөрчлөн зохион байгуулж хувьцаат компаний хэлбэрт шилжүүлэн нийт хувьцааны 54 хувийг МХБ-ээр худалдсанаар 100 тэрбумаас доошгүй, Нийслэлийн өмчит аж ахуйн тооцоот орон сууцны 24 газрыг менежментийн багт нь гэрээтэйгээр хувьчилснаас 20 тэрбумаас доошгүй санхүүгийн эх үүсвэр бүрдүүлэн хөрөнгө оруулалтанд зарцуулах нь зүйтэй байна.

Хорооны гишүүд төсвийн төслийн танилцуулгад заагдсан зарчим, үзэл баримтлалд нийцүүлэн 2015 оны төсөв нь Нийслэлийн засаг даргын мөрийн хөтөлбөр зорилтыг хэрэгжүүлэх орлогыг дайчлан нэмэгдүүлэх, зардлыг хэмнэх төрийн бодлого үйл ажиллагаатай нийцэх, Нийслэлд нэгэнт хэрэгжиж байгаа гэр хорооллын дахин төлөвлөлтийг эрчимжүүлэх, инженерийн болон нийгмийн дэд бүтцийн барилга байгууламжийн хөрөнгө оруулалтыг найдвартай эх үүсвэрээр тасралтгүй хангахад чиглэгдэх ёстой гэж үзсэн болно.

Дээрх зорилтыг хангахад газар эзэмшүүлэх дуудлага худалдааг зохион байгуулах, НӨҮГ болон НӨААТ газруудыг компаний хэлбэрт шилжүүлэх хувьцааг нь худалдах, үр ашиг муутай нийслэлийн төсөв орлого оруулдаггүй, төрийн болон нийтийн үйлчилгээний байнгын үүрэг хулээдэггүй харьяа газруудыг үнэлж дуудлагаар худалдах зэргээр хөрөнгө оруулалтын нэмэлт эх үүсвэр бүрдүүлэх цаг болсон гэж үзэж байна.

Энэ хамтарсан дүгнэлтийг НИТХ-ын Төсөв, санхүү эдийн ажлын хороонд хүргүүлж доорх томьёоллуудаар нэгдсэн хуралдаанд оруулан шийдвэрлүүлэхээр хүргүүлж байна.

Нийслэлийн 2015 оны төсвийн орлогын эх үүсвэрийг нэмэгдүүлэх зорилгоор доорх арга хэмжээнүүдийг төсөвт тусган батлах нь зүйтэй гэж үзсэн болно.Үүнд:

1.    Төсвийн орлогын 2015 оны төлөвлөгөөний төслийн 4.2 дүгээр зүйлд заасан Газрын төлбөрийн дүнг 3.0 тэрбум төгрөгөөр, төслийн 5.7 дугаар зүйлд заасан өмч хувьчлалын болон газрын дуудлага худалдааны орлогын дүнг 15.0 тэрбум төгрөгөөр тус тус нэмэгдүүлэх,

2.      Газрын дуудлага худалдаа, Өмч хувьчлал, НӨҮГ,НӨААТГ-уудын бүтцийн өөрчлөлт хийж хувьцааны 34 хүртэлх хувийг худалдсаны орлого нэмэгдсэнтэй холбогдуулан Нийслэлийн Төсвийн орлогын 2015 оны төлөвлөгөөний төслийн нийт орлого,тусламжийн дүнг 31.464 тэрбумаар, нийт орлогын дүнг 31.464 тэрбумаар, 2015 онд Нийслэлийн өөрийн хөрөнгө оруулалтын хэмжээг 31.464 тэрбум болгон тус тус нэмэгдүүлж, урсгал зардлын дүнг 28.464 тэрбумаар хасагдуулан батлах,

3.      Төсвийн орлогын нэмэгдсэн дээрх эх үүсвэрүүдийг Гэр хорооллыг дахин төлөвлөж барилгажуулах ажлын инженерийн болон нийгмийн дэд бүтцийг санхүүжүүлэх , тохилог амины орон сууцны хорооллын арга хэмжээнд зарцуулахаар төсвийн төслийг батлах тогтоолын 5 дугаар зүйлд нэмж тусган, 2015 онд хэрэгжүүлэх хөрөнгө оруулалтын төсөл арга хэмжээ, барилга байгууламжийн жагсаалтанд нэмж тусгах,

4.      Эзэмшүүлэх газрын сонголт хийж, хэмжээг тогтоон дуудлага худалдааг зохион байгуулах, НӨҮГ, НӨААТГ-уудыг хувьчлах, компаний хэлбэрт шилжүүлэн хувьцааны тодорхой хувийг худалдах.асуудлыг нарийвчлан боловсруулж 2015 оны 1 дүгээр улиралд НИТХ-д оруулах шийдвэрлүүлэхээр тогтоох

5.      Төсвийн төсөлд дээрх өөрчлөлтүүд орж байгаатай холбогдуулан 2015 онд хувьчлагдах хуулийн этгээд, эд хөрөнгийн жагсаалт болон газар зохион байгуулалтын төлөвлөгөөнд өөрчлөлт оруулах

6.      2015 оны Нийслэлийн төсөв, газар зохион байгуулалтын төлөвлөгөө, хувьчлагдах хуулийн этгээд, эд хөрөнгийн жагсаалтанд өөрчлөлт хийж нэгдсэн хуралдаанд оруулах хамтарсан ажпын хэсгийг НИТХ-ын даргын тушаалаар томилон ажиллуулах нь зүйтэй байна.

Төлөөлөгч Н.Баяраа:

Төсөвтөй холбоотой саналаа хэлье.

1.    Хотын зөндөө олон дүрэм боловсруулж байна. Ухаалаг Улаанбаатар хорооны хуралд суухад 10 гаран дүрэм байна лээ. Үүнийг би хотын иргэн төлөөлөгчийн  хувьд уншаад тэрнийхээ дагуу явна гэвэл би хувьдаа байхгүй. Нийслэлийн иргэд бүгдийг нь уншаад тэр дүрмийн дагуу амьдарна гэвэл би хувьдаа эргэлзэж байна. Хотын дүрэм байх ёстой юу гэвэл байх ёстой. Хотын хүн гэж шал ондоо ойлголт байх ёстой. Хотын дүрэм ганц л дүрэм байх ёстой. Энэ зүйлүүд дээр яагаад энэ олон мөнгө тавигдаад байдаг юм. Би энэ удаагийн тавьсан мөнгийг хасах саналтай байна. Найрсаг Улаанбаатар болон хэд хэдэн хөтөлбөрүүдийн задаргааг өгөөч хармаар байна.

2.    Нийслэлийн төр захиргаануудын байруудыг цэгцэлмээр байна. Төр захиргааны 1,2,3 ......10 гээд цааш нь явах юм шиг байна. Сүхбаатар дүүргийн тамгын газрын байрыг нураагаад оронд нь концессээр хувийн хэвшил байшин бариад нийслэлийн өмчийнхийг нь нийслэлд хүлээлгэж өгөөд үлдсэнийг нь хувийн хэвшил авна. Дахиал тэнд төр захиргааны байр гэж бичнэ. Байр нэмэгдэх тусам манай урсгал зардалууд нэмэгдэж байгаа.

3.    Засаг даргын нийгэм эдийн засгийн хөтөлбөрт тусгагдсан ажлууд байгаа. Тухайлбал Налайхын барилгын материалын  үйлдвэр технологийн парк байгаа. Энэ паркын эхний ажлуудыг эхлүүлнэ. Тэгсэн мөртлөө зураг төсвийн мөнгөн дээр багц мөнгө байгаа тэндээсээ зураг төсөв дээр тавиарай гэж байгаа. Одоо яг эхэлж байгаа ажил.   Нийгэм эдийн засгийн хөтөлбөрт тусгагдсан ажлууд дээр мөнгө төсөвлөж явахгүй бол ажлууд тасрах гээд байна.  Эхний ээлжинд ядаж тэр газраа хашаа бариад авчмаар байна. Тэгэхгүй бол хашаан дундуур нь зам явчихсан, хэн дуртай нь очоод буучихсан сүүлд нь тэрэн дээр парк байгуулна гэхэд маш хэцүү болчоод байна. Хашааны мөнгө нь 300 сая төгрөг болно. Үүнийг хурлын дарга та тэмдэглээрэй.  ТЭЗҮ дээрээ логистик төв гэж байгаа. Логистик төвөө 3 сараас эхний ээлжинд 1 тэр бум 200 сая төгрөгөөр барьчихад болно. Эхлээд логистик төвөө барьчих юм бол Баянзүрхийн товчоог цаашлуулаад том оврын ачааны машинуудыг буулгаад эхний ээлжийн үйл ажиллагаагаа эхлүүлээд логистик төвийнхөө мөнгийг эргэлтэнд оруулаад эргүүлээд олох боломж харагдаж байна. Иймэрхүү задаргаатай бизнес төлөвлөгөөтэй холбоотой асуудлуудыг ажлын хороон дээр би танилцуулъя гэж бодож байна.

Энэ 2 ажлыг буюу 1 тэрбум 500 сая төгрөгний асуудлыг 2015 оны төсөв дээр суулгаж өгөөчээ гэж хүсэж байна баярлалаа.  

Төлөөлөгч Д.Батбаяр:

Би 2 зүйлийн талаар санал хэлье

1.    Нийслэлийн эдийн засаг нийгмийн 2015 оны төсөл дээр хэлэх зүйл байна. Зорилтыг хэрэгжүүлэх ажиллагаагааг дараа нь хэмжиж үл болохуйц үгээр илэрхийлсэн байх юм. Жишээ нь: 2014 оны нийгэм эдийн засгийн зорилтын хэрэгжилтэн дээр нийслэлийн зарим аж ахуй нэгж, зарим агентлагууд хэрэгжилтээ ингэж бичсэн байна. НИТХ дахь журмаа боловсруулна гэж. Журмаа боловсруулан уу? Боловсруулсан 100%. НИТХ-аар шийдвэр гаргуулна. Танилцуулсан юм чинь шийдвэр гаргуулсан байж таарна.  Зорилтыг хэрэгжүүлэх үйл ажиллагаагаа зөв төлөвлөж чадахгүй байна. Манай газар агентлагийн дарга нар зорилтоо хэрэгжүүлэх үйл ажиллагаагаа дараа нь хэмжиж болохуйцаар төлөвлөөчээ гэж хэлэх гэсэн юм.       Өөр нэг жишээ хэлэхэд 2014 оны зорилтыг хэрэгжүүлэх үйл ажиллагаан дээр байгаа юм ахиад 2015 онд ороод ирэх юм. Цаг хугацаа нь дандаа 1-4 дүгээр улирал бүтэн жил. Дандаа аж ахуй нэгж иргэдийн үйл ажиллагааг дэмжиж оролцуулна гэж. Яг өөрсдөөс нь санаачлаад хийх юм ердөөсөө бичигдэхгүй байна. Үүнийг хэмжиж болохуйцаар төлөвлөж оруулж ирж байгаа ч гэж газар агентлагийн дарга нарт хүсье.

2.    Хөрөнгө оруулалтан дээр хэлэх юм байна. Үргэлж дэд бүтэц, барилга байшин, зам гүүр гэсэн зүйлүүд дээр хөрөнгө оруулалт хийгээд байх юм. Нийслэлийнхээ иргэдийнхээ эрүүл мэндэд анхаарах хэрэгтэй. Нийгмийнхээ баялаг болсон иргэдийнхээ эрүүл мэндэд ерөөсөө хөрөнгө оруулалт хийхгүй байна. Би Ухаалаг Улаанбаатар хөгжлийн хорооны гишүүний хувьд хорооны дарга Ц.Баатархүү, Эрүүл мэндийн газрын дарга Энхболд дарга нартай нийслэлийнхээ иргэдийн эрүүл мэндийг цахим хяналтанд бүртгэж авах ажил санаачлаад хэлсэн. Энэ тал дээр дорвитой ажил манай хорооны дарга болон Нийслэлийн эрүүл мэндийн газрын дарга нараас иргэдийнхээ эрүүл мэндэд дорвитой хөрөнгө оруулалт хийх  санал санаачлага оруулж ирээгүй байна.  Үүнтэй холбоотой 2015 онд бид Нийслэлийн иргэдийн эрүүл мэндийг цахим хяналтанд бүртгэж авах ажил хийх хэрэгтэй. Үүнд ямар ч байсан 3-4 тэрбум төгрөг хэрэгтэй гэж бодож байна. Нийслэл маань  152 өрхийн эмнэлэгтэй. 152 өрхийн эмнэлгээ 6 дүүргийн эмнэлэгтэй, цааш нь 6 дүүргийн эмнэлгээсээ поликлиниктэй холбоод нийслэлийн иргэдийг бүгдийг нь өвчний катигороор нь ангилаад цааш нь эмнэлгийн үзлэг оношлогоо эмчилгээгээр үйлчлүүлэх боломжоор хангаж өгөх хэрэгтэй байна. Тэгэхгүй бол өнөөдрийн байдлаар эмнэлэгт хэдхэн хүн л циклээр очиж хэвтэж эмчлүүлдэг, хөгшчүүл эрүүл мэндийн даатгалаар эмчлүүлдэг. Арын хэсэг хүмүүс нь ерөөсөө эмнэлгийн тусламж үйлчилгээ авч чадахгүй байна. Өнөөдөр 21-р зуун юм болгоныг том төрөөс ухаалаг төр гэж явж байна, СТАРТ үйлчилгээ гэж явж байна. Энэ иргэдийнхээ эрүүл мэндийн үйлчилгээг СМАРТ үйлчилгээтэй болгомоор байна. Ухаалаг улаанбаатар арга хэмжээндээ тавьсан байгаа 2 тэрбум төгрөг бусад мөнгийг нийслэлийнхээ иргэдийн эрүүл мэндийг цахим хяналтанд оруулж өгөх саналыг би дэвшүүлж байна. Энэ  4 тэмбум төгрөг гэдэг бол 4 км-ийн зам төсвийн мөнгөөр бид 30 тэрбум төгрөгөөр зам тавьж байна. Яагаад нийслэлийнхээ эрүүл мэндийн төлөө хөрөнгө оруулалт хийж болохгүй гэж. Миний саналыг манай төлөөлөгчид дэмжих байх гэж бодож байна.

           

Нийслэлийн 2015 оны төсөв /Төсөл/

Нийслэлийн 2015 оны газар зохион байгуулалтын төлөвлөгөө /төсөл/

2015 онд нийслэлд концессээр хийгдэх ажлуудын жагсаалт /төсөл/

Нийслэлийн өмчөөс 2015 онд хувьчлагдах эд хөрөнгийн жагсаалтын төсөл

Нийслэлийн 2015 оны нийгэм, эдийн засгийн зорилтын төсөл

Нийслэл Улаанбаатар хотын нийгэм, эдийн засгийн 2014 оны зорилтын хэрэгжилтийн тайлан

Улаанбаатар хотын замын хөдөлгөөнийг зохицуулах зарим арга хэмжээний төсөл

НИТХ-ЫН ТЭРГҮҮЛЭГЧДИЙН ХУРАЛДААН БОЛЛОО

Өнөөдөр буюу 2014.11.25-ны өдөр НЗДТГ-ын А танхимд Нийслэлийн иргэдийн Төлөөлөгчдийн Хурлын Тэргүүлэгчдийн хуралдаан боллоо. Хуралдаанд тэргүүлэгч Д.Баттулга, Л.Шагдаррагчаа, А.Гантулга, Ц.Одонтунгалаг, Д.Болдбаатар, Г.Ганбаяр, Д.Байдраг, Т.Гантөмөр, нийслэлийн аудитын газрын дарга Очирбат, Улаанбаатар хотын ерөнхий менежир Б.Бадрал, НИТХ-ын ТНБД Б.Энхболд бол бусад ажилтан албан хаагч, хэвлэл мэдээллийн ажилчид оролцлоо. Хуралдаан 10:00 цагт эхэлж, 12:48 цагт дуусав. Хуралдаанаар дараах асуудлуудыг хэлэлцлээ.

1. Нийслэл, дүүргийн орон нутгийн төсөвт байгууллага, өмчит үйлдвэрийн газрын ажиллагсдад үр дүнгийн шагнал урамшуулал олгох, нийгмийн асуудлыг шийдвэрлэх журам
2. БГД-ийн 1-р хорооны нутагт байрлах 80 айлын орон сууцыг хөрөнгөөс хасах тухай
3. Гэр хорооллын хөгжлийн газрын блансад бүртгэлтэй 5 барилгыг СБД, ЧД, СХД-үүдэд шилжүүлэх тухай
4. НӨХГ-ын блансад бүртгэлтэй МУБИС-ын урд талын нүхэн гарцыг СБД-ийн блансад шилжүүлэх тухай
5. БЗД-ийн 87-р сургуулийн блансад бүртгэлтэй барилгыг тус дүүргийн цагдаагийн 3-р хэсгийн блансад шилжүүлэх тухай
6. СХД-ийн 18, 27, 28-р хороодын нутаг дэвсгэрт байрлах хороо, өрхийн эмнэлэг, цагдаагийн хэлтсийн цогцолбор барилгуудыг СХД-ийн блансад шилжүүлэх тухай
7. Угсармал орон сууцны барилгын дулаан техникийн шинэчлэлтийн дэд хөтөлбөр батлах тухай
8. Алтан-Өлгийн оршуулгын газрын үйл ажиллагааг сайжруулах тухай
9. НИТХ-ын ээлжит 21-р хуралдааныг зарлах тухай асуудлуудыг тус тус хэлэлцлээ.

“Нийслэл, дүүргийн орон нутгийн төсөвт байгууллага, өмчит үйлдвэрийн газрын ажиллагсдад үр дүнгийн шагнал урамшуулал олгох, нийгмийн асуудлыг шийдвэрлэх журам”-ийн төслийг Нийслэлийн Засаг даргын орлогч Н.Батаа танилцуулав.

НЗД-ын орлогч Н.Батаа: Нийслэлийн бүх шатны ажилтан албан хаагчдын хагас бүтэн жилийн үр дүнгийн гэрээг хянан үзээд сайн ажилласан ажилтнуудыг тодорхой хэмжээгээр урамшуулах асуудал байгаа үүнд нийтдээ 4.5 тэрбум төгрөг шаардагдахаар байгаа. Нийслэлийн бүтээн байгуулалтад онцгой гавьяа байгуулсан хүмүүст 1 сарын цалингийн хэмжээг олгох, нийгмийн асуудлуудыг тодорхой хэмжээгээр шийдвэрлэх асуудлуудыг тусгасан байгаа гэв.

Тэргүүлэгч А.Гантулга: Ажлаа хийж чаддаг хүмүүсийг маш сайн дэмжих ёстой. Харин хийхгүй байгаа нөгөө хэцүү нэртүүдтэй хариуцлага сайн тооцох ёстой шүү.

Тэргүүлэгч Ж.Амарсанаа: Өнгөрсөн жил манай эрүүл мэндийн салбарт урамшуулал олгох асуудал босч ирээд сүүлдээ хавтгайрсан жишиг байгаа. Хороо дүүргийн эмнэлэгүүдийн цалин маш муу учраас хүний нөөц нь байнга өөрчлөгддөг юм билээ. Урамшуулал байх ёстой гэхдээ хэрхэн өгөх шалгуур нь сайн байх ёстой.

Тэргүүлэгч Л.Шагдаррагчаа: нийслэлийн засаг даргаасаа аваад нийслэлийн бүх шатны албан хаагчид жилийн эцэст хэмнэж чадсан төсвйинхөө 70 хувиар шагнуулах журмын төсөл орж ирж байгаа юм байна. Урьд нь ийм зүйл байсан юм байна. МУЗЗНДНТУТХ-д дүүргүүдийн асуудлыг нийслэл шийдэхийг хориглоно гэсэн заалт байдаг. Нийслэлийнхэн дүүргүүдийн дотоод ажилд оролцоод байж болж байгаа юм уу. Төрийн зардлыг хэмнээд л өөрсдийгөө шагнадаг болчихоор чинь төрийн байгууллагаад зарлагаа бага тавиад зардлаа өндөр тавьдаг буруу жишиг тогтчих юм биш бээз. Хэрвээ журмын хэрэгжилтэндээ онцгой  анхаарахгүй бол саяны татварынхан шиг бөөн асуудал дагуулж, төсвөөс завших эрхзүйг нь бүрдүүлсэн гэдэг үндэслэлээр тэргүүлэгчид буруудах юм биш биз дээ. Би төрийн албан хаагчдыг шагнахыг эсэргүүцэж, бас буруутгаж байгаа юм биш ээ. Гэхдээ хэрэгжилтэд анхаарал тавьж журмаа нарийн боловсруулж дахин оруулж ирвэл батлахад дургүйцэх зүйл алга.

Тэргүүлэгчид уг асуудлыг хэлэлцээд татварынхан өөрсдөдөө яг ийм урамшууллын журам гарган батлуулаад тэрнийхээ дагуу их хэмжээний мөнгийг идэж уусан хэрэгт оролцолдоод байгаа. Нийслэл ч гэсэн ийм асуудалд энэ журмаас болж орооцолдох юм байна. Тиймээс энэ журмын төслөө сайжруулж оруулж иртэл энэ асуудлыг дэмжих боломжгүй хэмээн үзэж буцаалаа.

2, 3, 4, 5, 6-р асуудлын талаар ямар нэгэн асуулт, санал гаргалгүйгээр дэмжиж батласан бол 7-р асуудлыг боловсруулалт муу, шийдвэрлээгүй олон асуудал байна гэдэг үндэслэлээр буцаалаа.  

Харин Алтан-Өлгий оршуулгын газрын үйл ажиллагааг сайжруулах асуудлыг Улаанбаатар хотын ерөнхий менежир Б.Бадрал буцааж татсан юм.

Хуралдааны хамгийн сүүлийн асуудал нь НИТХ-ын ээлжит 21-р хуралдааныг батлах асуудал байсан бөгөөд НИТХ-ын ээлжит 21-р хуралдааныг 2014.11.27-нд 09:00 цагаас Хангарьд ордонд хуралдуулахаар боллоо.

Ээлжит 21-р хуралдаанаар:

1. Улаанбаатар хотын замын хөдөлгөөнийг зохицуулах талаар авах арга хэмжээний тухай.
2. Нийслэлийн нийгэм, эдийн засгийн 2014 оны зорилтын хэрэгжилт, 2015 оны нийгэм эдийн засгийн зорилтыг батлах тухай
3. 2015 онд нийслэлийн өмчөөс хувьчлагдах хуулийн этгээд хөрөнгийн жагсаалтыг батлах тухай
4. Нийслэлийн өмчийн концессийн зүйлийн жагсаалт батлах тухай
5. Нийслэлийн 2014 оны газар зохион байгуулалтын төлөвлөгөөний биелэлт, 2015 оны газар зохион байгуулалтын төлөвлөгөөг батлах тухай
6. Нийслэлийн 2015 оны төсөв батлах тухай гэсэн асуудлыг хэлэлцүүлэх тогтоолыг баталлаа.

НИТХ дахь МАХН-МҮАН-ын “Шударга ёс” эвслийн бүлгийн ажлын алба

НИТХТ-ийн 2014.11.25-ны өдрийн хуралдаанаар хэлэлцэх асуудлын төлөвлөгөө

НИТХ-ын тэргүүлэгчдийн 2014.11.13-ны өдрийн хуралдаанаар баталсан тогтоолууд

НИТХ-ын тэргүүлэгчдийн хуралдаанаар дараах асуудлуудыг хэлэлцэж байна

2014-11-12-ны өдрийн тэргүүлэгчдийн хурлаар хэлэлцэх асуудлын төлөвлөгөө

Нийслэлийн Засаг Даргын Захирамж 2014 оны А/835-А/856

Нийслэлийн Засаг Даргын Захирамж 2014 оны А/857-А/914

Нийслэлийн Засаг даргын 2014 оны А/769-А/834 захирамж

Нийслэлийн Засаг даргын захирамж 2014 оны А/740-А/764

НИТХ-ын тэргүүлэгчдийн 2014.10.22-ны хуралдаанаар баталсан тогтоолууд

Нийслэлийн 375 жилийн ойн медиалаар шагналаа

Улаанбаатар хот үүсгэн байгуулагдсаны 375 жилийн ойн /2014 оны 10 дугаар сарын 29-нд/ өдрөөр НИТХ дахь МАХН-МҮАН-ын “Шударга ёс” эвслийн бүлгийн төлөөлөгчид, ажлын албаны ажилтан албан хаагчдыг Нийслэлийн 375 жилийн ойн медъяалаар шагналаа.